កាលពីថ្ងៃទី១៧ ខែកក្កដា ឆ្នាំ២០២០ លោកជំទាវ ឆាយ លក្ខិណា អគ្គនាយិកានៃក្រុមហ៊ុន ខេមបូឌាន ដេរីវ៉េទីវ អ៊ិចឆេង បានផ្ដល់នូវការគាំទ្រដល់ក្រុមហ៊ុន ហ្គោលដេន អេហ្វអិកស៍ លីង ឃែភីថល ដែលជាក្រុមហ៊ុនឈ្មួញជើងសាឧបករណ៍និស្សន្ទនាំមុខគេមួយរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង និងជាក្រុមហ៊ុនកំពូលមួយក្នុងចំណោមក្រុមហ៊ុនឈ្មួញជើងសាឧបករណ៍និស្សន្ទឆ្នើមទាំងបីនៅកម្ពុជា (យោងតាមរបាយការណ៍ផ្លូវការរបស់គណៈកម្មការមូលបត្រកម្ពុជា) ក្នុងការបង្ហាញពីភាពសាមញ្ញនិងភាពងាយស្រួលនៃការវិនិយោគ ក៏ដូចជាការទាញយកផលចំណេញពីការជួញដូរឧបករណ៍និស្សន្ទ ដើម្បីជាប្រយោជន៍ដល់វិនិយោគិន។ ការគាំទ្រនេះ ស្ថិតក្នុងរូបភាពជាការផ្សាយផ្ទាល់នៅលើទំព័រហ្វេសប៊ុកផ្លូវការរបស់ក្រុមហ៊ុន ដោយលោកជំទាវបានពន្យល់អំពីការជួញដូរមាសរូបិយប័ណ្ណសំខាន់ៗ និងផលិតផលកសិកម្មផ្សេងទៀតនៅលើកម្មវិធីជួញដូរ មេតាត្រេដឺ ៤។
សកម្មភាពនេះ បានឆ្លុះបញ្ចាំងយ៉ាងច្បាស់អំពីបេសកកម្មរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង លើការផ្តល់ការគាំទ្រពេញទំហឹងដល់ក្រុមហ៊ុនឈ្មួញជើងសាឧបករណ៍និស្សន្ទរបស់ខ្លួន ក៏ដូចជាលើការរួមបញ្ចូលការជួញដូរឧបករណ៍និស្សន្ទទៅជាធាតុផ្សំសំខាន់មួយនៃឧស្សាហកម្មហិរញ្ញវត្ថុ ក្នុងដំណើរឆ្ពោះទៅរកការអភិវឌ្ឍសេដ្ឋកិច្ចកម្ពុជា នៅគ្រប់កាលៈទេសៈទាំងអស់។
លោកជំទាវ ឆាយ លក្ខិណា បានមានប្រសាសន៍ថា៖ «នេះគឺជាការផ្លាស់ប្តូរមួយរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង ក្នុងការទាញយកសារៈប្រយោជន៍ពីបណ្តាញប្រព័ន្ធផ្សព្វផ្សាយ ដែលត្រូវបានប្រើប្រាស់ជាវិធីសាស្រ្តក្នុងការផ្ដល់ការអប់រំនិងការចែករំលែកនូវឱកាសវិនិយោគដល់សាធារណជន។ ការផ្សាយផ្ទាល់នៅលើទំព័រហ្វេសប៊ុកក្នុងថ្ងៃនេះ គឺគ្រាន់តែជាឧទាហរណ៍បង្ហាញថាគ្មានអ្វីអាចបញ្ឈប់យើងបាននោះទេ ហើយយើងតែងតែផ្ដល់នូវការគាំទ្រខ្លាំងក្លាដល់ក្រុមហ៊ុនឈ្មួញជើងសាឧបករណ៍និស្សន្ទរបស់យើង ជាពិសេសលើយុទ្ធនាការទីផ្សារនាអំឡុងពេលដ៏លំបាកដែលបណ្ដាលមកពីជំងឺកូវីដ-១៩ នេះ។»