ភ្នំពេញ៖ក្រុមហ៊ុន ខេមបូឌាន ដេរីវ៉េទីវ អ៊ិចឆេង នឹងក្រុមហ៊ុន IG Markets Group ដែលជាក្រុមហ៊ុន ផ្ដល់សេវា ជួញដូររូបិយប័ណ្ណ អន្តរជាតិ ដ៏ធំបំផុតមួយ នៅទ្វីបអឺរ៉ុប និងមានបទពិសោធន៍ជាង៤០ឆ្នាំ មកហើយនៅក្នុងវិស័យហិរញ្ញវត្ថុ នាពេលថ្មីៗនេះបានបើកកិច្ចប្រជុំពិសេសមួយ ដើម្បីពិភាក្សា ទៅលើ កិច្ចសហប្រតិបត្តិការ សក្តានុពលមួយ សម្រាប់ការពង្រីក អាជីវកម្ម និងការអភិវឌ្ឍទីផ្សារ នៅក្នុងតំបន់អាស៊ីប៉ាស៊ីហ្វិក។
តំណាងនៃ ក្រុមហ៊ុន ខេមបូឌាន ដេរីវ៉េទីវ អ៊ិចឆេង ដែលបានចូលរួមក្នុងកិច្ចប្រជុំនៅទីក្រុងឌូបៃ នៃសហព័ន្ធអារ៉ាប់រួមនេះរួមមាន លោក Lawrence Kook (អភិបាល) លោក Onyen Yong (ទីប្រឹក្សាផ្នែកច្បាប់) លោក John Hsu (នាយកផ្នែកគម្រោងពិសេស) និងលោក Michael Tam (ប្រធានផ្នែករដ្ឋបាល និងហិរញ្ញវត្ថុ) ខណៈដែលក្រុមហ៊ុន IG Markets Group មានលោក Adam Dance ដែលជាមន្ត្រីប្រតិបត្តិជាន់ខ្ពស់ជាតំណាង។
ក្នុងកិច្ចប្រជុំនេះ បានកើតឡើងស្របពេលដែល ក្រុមហ៊ុន ខេមបូឌាន ដេរីវ៉េទីវ អ៊ិចឆេង កំពុងផ្ដោតទៅលើការពង្រីកទំហំអាជីវកម្ម ទៅកាន់តំបន់ផ្សេងៗ នៃពិភពលោក និងបានកត់សម្គាល់ថា ក្រុមហ៊ុន IG Markets Group អាចជាដៃគូសហការរយៈពេលវែង ដ៏មានសក្តានុពលមួយ ក្នុងការសម្រេចបាន នូវផែនការ និងគោលដៅនានា។
សូមជម្រាបថា ជាមួយនឹងឯកទេស និងបទពិសោធន៍ដ៏សម្បូរបែប នៃក្រុមហ៊ុនទាំងពីរ កិច្ចសហប្រតិបត្តិការ ដែលអាចនឹងកើតមានឡើងមួយនេះ ត្រូវបានរំពឹងថា វានឹងនាំយកមកនូវពន្លឺ ដ៏ត្រចះត្រចង់សម្រាប់ ការអភិវឌ្ឍនៅក្នុងតំបន់អាស៊ីប៉ាស៊ីហ្វិក។
សម្រាប់ព័ត៌មានបន្ថែមអំពីក្រុមហ៊ុន ខេមបូឌាន ដេរីវ៉េទីវ អ៊ិចឆេង សូមចូលទៅគេហទំព័រ www.cdx.com.kh ឬទំព័រហ្វេសប៊ុក Cambodian Derivatives Exchange៕