ក្រុមហ៊ុន ខេមបូឌាន ដេរីវ៉េទីវ អ៊ិចឆេង និងគណៈកម្មការមូលបត្រកម្ពុជា បានបញ្ចប់សិក្ខាសាលានៅគោលដៅទីបួនរបស់ខ្លួនក្នុងខេត្តបន្ទាយមានជ័យប្រកបដោយភាពជោគជ័យ បន្ទាប់ពីស្ថាប័នទាំងពីរបានជម្រុញការយល់ដឹងជាសាធារណៈលើការជួញដូរឧបករណ៍និស្សន្ទនៅខេត្តព្រះសីហនុ ខេត្តកំពង់ចាម និងខេត្តសៀមរាបរួចមក។ សិក្ខាសាលានៅខេត្តបន្ទាយមានជ័យនេះ បានប្រព្រឹត្តិទៅនៅថ្ងៃទី 07 ខែធ្នូ ឆ្នាំ 2018 ដោយមានវត្តមានរបស់សិក្ខាកាមជាច្រើនរូប រួមទាំងមន្រ្តីរដ្ឋាភិបាល អ្នកជំនួញ និងវិនិយោគិនសក្ដានុពល។
ឯកឧត្តម សុខ ដារ៉ា អគ្គនាយករងនៃគណៈកម្មការមូលបត្រកម្ពុជា បានថ្លែងនូវមតិស្វាគមន៍ ណែនាំអំពីឧបករណ៍និស្សន្ទ ក៏ដូចជាបញ្ជាក់ពីការប្ដេជ្ញាចិត្តរបស់គណៈកម្មការមូលបត្រកម្ពុជា ក្នុងការលើកកម្ពស់ការរីកចម្រើននៃទីផ្សារឧបករណ៍និស្សន្ទនៅកម្ពុជា លើបទប្ប ញ្ញាតិ ទំហំនិងបទដ្ឋាននៃការជួញដូរ និងការយល់ដឹងរបស់សាធារណៈជនលើវិស័យមួយនេះ។ លោក យន់ សុវណ្ណារ៉ា អនុប្រធានការិយាល័យគ្រប់គ្រងអាជីវកម្មគម្រោងវិនិយោគរួម និងអាជីវកម្មឧបករណ៍និស្សន្ទនៃគណៈកម្មការមូលបត្រកម្ពុជា បានផ្ដោតសំខាន់លើទិដ្ឋភាពទូទៅនៃការជួញដូរឧបករណ៍និស្សន្ទ ការលូតលាស់នៃទីផ្សារឧបករណ៍និស្សន្ទនៅកម្ពុជា ក្របខ័ណ្ឌបទប្បញ្ញាតិ និងបេសកកម្មបន្តបន្ទាប់របស់គណៈកម្មការមូលបត្រកម្ពុជាក្នុងការជម្រុញវិស័យឧបករណ៍និស្សន្ទឱ្យកាន់តែប្រសើរឡើង។
ដោយសារតែក្រុមហ៊ុន ខេមបូឌាន ដេរីវ៉េទីវ អ៊ិចឆេង គឺជាក្រុមហ៊ុនសមភាគីកណ្ដាលតែមួយគត់ ដែលចូលរួមក្នុងគ្រប់គោលដៅទាំងអស់នៃសិក្ខាសាលាតាមបណ្ដាខេត្តរបស់គណៈកម្មការមូលបត្រកម្ពុជានៅក្នុងឆ្នាំ2018នេះ និងជាក្រុមហ៊ុនតែមួយគត់ ដែលមកពីប្រទេសកម្ពុជា និងតំបន់អាស៊ី ដែលបានណែនាំពីវប្បធម៌ និងបានបង្ហាញនូវឱកាសវិនិយោគជាច្រើនដល់វិនិយោគិនបរទេសនៅក្នុងពិព័រណ៍អន្តរជាតិនានា ដូចជា iFX Expo នៅប្រទេសសាយប្រឺស និង “2018 London Summit” នៅប្រទេសអង់គ្លេស ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានបង្ហាញឧទាហរណ៍មួយនៃការប្ដេជ្ញាចិត្តមិនរួញរាទៅលើអនាគតភ្លឺស្វាងនៃទីផ្សារឧបករណ៍និស្សន្ទនៅកម្ពុជា ហើយត្រូវបានចាត់ទុកជាក្រុមហ៊ុនគំរូមួយនៅក្នុងវិស័យនេះ។
ក្នុងនាមជាវាគ្មិនកិត្តិយស លោក Lawrence Kook អភិបាលនៃក្រុមហ៊ុន ខេមបូឌាន ដេរីវ៉េទីវ អ៊ិចឆេង បានបង្ហាញសុទិដ្ឋិនិយមទៅលើសិក្ខាសាលាតាមបណ្ដាខេត្តនេះ និងបានគូសបញ្ជាក់ថា ការផ្សព្វផ្សាយអំពីការវិនិយោគលើឧបករណ៍ហិរញ្ញវត្ថុជាសាធារណៈ គឺជាការងារអាទិភាពរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង។ ជាមួយគ្នានេះដែរ លោក Lawrence បានចែករំលែកនូវបទពិសោធន៍របស់លោកលើទីផ្សារអន្តរជាតិ ហើយមានជំនឿយ៉ាងមុតមាំថាទីផ្សារឧបករណ៍និស្សន្ទនៅកម្ពុជាកំពុងឆ្ពោះទៅរកសក្តានុពលពេញលេញរបស់វា។
en
zh
