ក្រុមហ៊ុន ខេមបូឌាន ដេរីវ៉េទីវ អ៊ិចឆេង ចែករំលែកជំនាញ និងទស្សនវិស័យតាមរយៈសិក្ខាសាលាអន្ដរជាតិ

កាលពីថ្ងៃទី២៣ ខែមិថុនា ឆ្នាំ២០២០ ក្រុមហ៊ុន ខេមបូឌាន ដេរីវ៉េទីវ អ៊ិចឆេង និងវិទ្យាស្ថានពាណិជ្ជកម្ម និងការគ្រប់គ្រងការវិនិយោគ បានសហការរៀបចំសិក្ខាសាលាតាមអនឡាញជាលក្ខណៈអន្ដរជាតិ ក្រោមប្រធានបទ «ការណែនាំអំពីសមាគមអ្នកវិភាគបច្ចេកទេសគុណវុឌ្ឍិ និងការជួញដូរឧបករណ៍ហិរញ្ញវត្ថុ» ដោយមានការចូលរួមគាំទ្រដោយសមាគមអ្នកវិភាគបច្ចេកទេសនៅចក្រភពអង់គ្លេស សមាគមអ្នកវិភាគបច្ចេកទេសនៅប្រទេសមីយ៉ាន់ម៉ា និងក្រុមហ៊ុន New World Financial Group ក្នុងគោលបំណងពិភាក្សាលើស្ថានភាពនាពេលបច្ចុប្បន្ន ចែករំលែកអំពីចំណេះជំនាញក្នុងការជួញដូរឧបករណ៍ហិរញ្ញវត្ថុ និងបង្ហាញអំពីឱកាសជាសាកល ដែលបណ្ដាលមកពីការរាតត្បាតនៃជំងឺកូវីដ១៩។

សិក្ខាសាលាដ៏គួរឱ្យកត់សម្គាល់មួយនេះ បានទទួលការចូលរួមពីវាគ្មិនដែលមានកេរ្ដិ៍ឈ្មោះចំនួន៣រូប ដូចជា៖ លោក Lawrence Kook អភិបាលនៃក្រុមហ៊ុន ខេមបូឌាន ដេរីវ៉េទីវ អ៊ិច ឆេង លោក Alex Rudolph ប្រធានផ្នែកអប់រំនៃសមាគមអ្នកវិភាគបច្ចេកទេស និងអភិបាលនៃ Commerzbank និងលោក Aung Thein Tun នាយកវិទ្យាស្ថានពាណិជ្ជកម្ម និងការគ្រប់គ្រងការវិនិយោគ។ វាគ្មិនទាំងបី សុទ្ធតែមានបទពិសោធន៍ជាច្រើនឆ្នាំក្នុងវិស័យហិរញ្ញវត្ថុ និងត្រូវបានទទួលស្គាល់ជាលក្ខណៈអន្តរជាតិលើឯកទេស និងវិជ្ជាជីវៈរបស់ពួកគាត់។ សម្រាប់អ្នកចូលរួមដែលត្រូវបានកំណត់ត្រឹម ៣០០ នាក់ ពួកគាត់មានសមាសភាពជា៖ អ្នកគ្រប់គ្រងទ្រព្យ អ្នកជួញដូរ ឈ្មួញជើងសា ពាណិជ្ជករ អ្នកគ្រប់គ្រងផលបត្រ អ្នកស្រាវជ្រាវ អ្នកវិភាគទីផ្សារ អ្នកជំនាញវិនិយោគ និង អ្នកវិនិយោគឯកជនដែលមកពីតំបន់ផ្សេងៗគ្នានៅទូទាំងពិភពលោក។

តាមរយៈការធ្វើបទបង្ហាញដែលមានលក្ខណៈងាយយល់ វាគ្មិនកិត្តិយស បានជួយឱ្យអ្នកចូលរួមទាំងអស់ទទួលបានការយល់ដឹងពាក់ព័ន្ធទៅនឹងសមាគមអ្នកវិភាគបច្ចេកទេស និងទិដ្ឋភាពទូទៅលើការជួញដូរឧបករណ៍ហិរញ្ញវត្ថុ រួមមាន ចំណេះដឹងផ្នែកបច្ចេកទេស ជំនាញជួញដូរ និងការកំណត់ផ្នែកដែលត្រូវអភិវឌ្ឍបន្ថែម ដើម្បីបំពេញនិងឱ្យសមស្របតាមការរំពឹងទុករបស់អ្នកចូលរួម លើការអភិវឌ្ឍសមត្ថភាពផ្ទាល់ខ្លួន និងការបង្កើតលទ្ធផលវិនិយោគឱ្យកាន់តែល្អប្រសើរ។

ចំពោះក្រុមហ៊ុន ខេមបូឌាន ដេរីវ៉េទីវ អ៊ិចឆេង យើងពិតជាមានកិត្តិយស និងមោទកភាព ដោយក្នុងនាមជាអ្នកតំណាងជាន់ខ្ពស់របស់ក្រុមហ៊ុន លោក Lawrence Kook បានបង្ហាញអំពីកម្រិតដ៏ខ្ពស់មួយនៃជំនាញឯកទេស ទស្សនវិស័យ និងស្ដង់ដារនៃវិជ្ជាជីវៈរបស់យើងនៅលើវេទិកាអន្តរជាតិ។ ការចូលរួមចំណែកមួយនេះ គឺជាការបន្ដដំណើរជានិរន្តរ៍របស់ក្រុមហ៊ុនក្នុងការក្លាយខ្លួនជាធនធាននៃការអភិវឌ្ឍដ៏អស្ចារ្យមួយនៅក្នុងទីផ្សារឧបករណ៍និស្សន្ទអន្ដរជាតិ និងជាក្រុមហ៊ុនឈានមុខគេមួយក្នុងវិស័យនេះ។ ការចូលរួមចំណែកនេះ ក៏បានឆ្លុះបញ្ចាំងពីកិច្ចខិតខំប្រឹងប្រែង និងការផ្ដោតយកចិត្ដទុកដាក់លើការជំរុញការអប់រំ និងការបណ្ដុះបណ្ដាលធនធានមនុស្ស មិនត្រឹមតែនៅក្នុងប្រទេសកម្ពុជាដែលមានមូលដ្ឋានរបស់ក្រុមហ៊ុនប៉ុណ្ណោះទេ ប៉ុន្ដែនៅគ្រប់ទីកន្លែងទាំងអស់នៃពិភពលោកទាំងមូល។

លោក Lawrence បានបង្ហាញចំណាប់អារម្មណ៍របស់គាត់ថា៖ «ខ្ញុំពិតជាសប្បាយរីករាយណាស់ ដែលបានធ្វើជាវាគ្មិនម្នាក់សម្រាប់សិក្ខាសាលាតាមប្រព័ន្ធអនឡាញមួយនេះ ហើយរឹតតែសប្បាយរីករាយទៅទៀត នៅពេលដែលខ្ញុំឃើញចំនួនដ៏ច្រើននៃអ្នកចុះឈ្មោះចូលរួម។ ទាំងអស់នេះបានបង្ហាញថា សាធារណជនកាន់តែច្រើនឡើង មានការយល់ដឹងអំពីវិស័យរបស់យើង ដែលជាការវិនិយោគលើឧបករណ៍ហិរញ្ញវត្ថុ ឬការជួញដូរឧបករណ៍និស្សន្ទ។ បំណងយ៉ាងខ្លាំងក្លារបស់សាធារណជនក្នុងការទទួលបានការអប់រំអំពីការវិនិយោគ ពិតជាធ្វើឱ្យយើងមានអារម្មណ៍រំភើប ពីព្រោះវាបានបង្ហាញអំពីលទ្ធផលល្អប្រសើរនៃបេសកកម្មផ្ដល់ការអប់រំពាក់ព័ន្ធនឹងឧបករណ៍និស្សន្ទជាសាកល និងការរីកចម្រើនប្រកបដោយនិរន្ដរភាព។»
ក្រោយពីសិក្ខាសាលានេះត្រូវបានបញ្ចប់ដោយជោគជ័យ នៅថ្ងៃបន្ទាប់ ក្រុមហ៊ុន ខេមបូឌាន ដេរីវ៉េទីវ អ៊ិចឆេង និងគណៈកម្មការមូលបត្រកម្ពុជា ដែលជានិយ័តករទីផ្សារឧបករណ៍និស្សន្ទកម្ពុជា និងជាដៃគូយូរអង្វែងរបស់ខ្លួន បានសម្ពោធ «ពិធីបើកដំណើរការភាពជាដៃគូលើការផ្ដល់វគ្គបណ្ដុះបណ្ដាលពាក់ព័ន្ធនឹងឧបករណ៍និស្សន្ទជាលក្ខណៈអន្ដរជាតិ» ក្នុងគោលបំណងផ្តល់ជូននូវវគ្គបណ្ដុះបណ្ដាលដែលមានលក្ខណៈទូលំទូលាយជាសាកលសម្រាប់បុគ្គលពាក់ព័ន្ធ និងតួអង្គទាំងអស់នៅក្នុងទីផ្សារ ដើម្បីបំពេញបន្ថែមនូវចំណេះដឹង ជំនាញ និងបទពិសោធន៍ក្នុងការជួញដូរ ឬប្រកបអាជីវកម្មឱ្យមានប្រសិទ្ធភាព។

កម្រងរូបថត

បន្ថែមទៀត