ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានផ្តល់ការគាំទ្រយ៉ាងពេញទំហឹងដល់ក្រុមហ៊ុន ឈ្មួញជើងសាឧបករណ៍និស្សន្ទរបស់ខ្លួន គឺក្រុមហ៊ុន ហ្គោលដេន អេហ្វអិកស៍ លីង ឃែភីថល ក្នុងការរៀបចំវគ្គបណ្តុះបណ្តាលពិសេសមួយ ក្រោមប្រធានបទ”អត្ថប្រយោជន៍នៃការផ្សារភ្ជាប់ទីផ្សារឧបករណ៍និស្សន្ទ និងទីផ្សារអចលនទ្រព្យ” ។ វគ្គបណ្តុះបណ្តាលនេះ បានប្រព្រឹត្តទៅនៅថ្ងៃទី ១៦ ខែមីនាឆ្នាំ ២០១៩។ លោក Lawrence Kook អភិបាលនៃក្រុមហ៊ុន ខេមបូឌាន ដេរីវ៉េទីវ អ៊ិចឆេង គឺជាវាគ្មិនពិសេសមួយរូប ដែលបានបង្ហាញពីទិដ្ឋភាពទូទៅនៃទីផ្សារឧបករណ៍ និស្សន្ទ និងទីផ្សារអចលនទ្រព្យ ទំនាក់ទំនងរវាងទីផ្សារទាំងពីរជាមធ្យោបាយនៃការវិនិយោគ និងយុទ្ធសាស្រ្តក្នុងការផ្សារភ្ជាប់ទីផ្សារទាំងពីរដើម្បីភាពល្អប្រសើរ។
ដោយមានការទទួលស្គាល់ពីគណៈកម្មការមូលបត្រកម្ពុជា ក្រុមហ៊ុន ខេមបូឌាន ដេរីវ៉េទីវ អ៊ិចឆេង គឺជាក្រុមហ៊ុនសមភាគីកណ្តាលនៃក្រុមហ៊ុន ហ្គោលដេន អេហ្វអិកស៍ លីង ឃែភីថល និងក្រុមហ៊ុនឈ្មួញជើងសាឧបករណ៍និស្សន្ទចំនួន១២ផ្សេងទៀត។ ក្នុងនាមជាក្រុមហ៊ុនសមភាគីកណ្តាលឈានមុខ រួមជាមួយនឹងស្មារតីនៃការផ្តល់នូវការគាំទ្រ ក៏ដូចជាសេវាកម្មល្អបំផុតដល់ក្រុមហ៊ុនឈ្មួញជើងសាឧបករណ៍និស្សន្ទ ក្រុមហ៊ុន ខេមបូឌាន ដេរីវ៉េទីវ អ៊ិចឆេង មានវត្តមាននៅគ្រប់ផ្នែកទាំងអស់តាមសំណើររបស់ក្រុមហ៊ុនឈ្មួញជើងសារបស់ខ្លួន មិនថាជាការចុះបញ្ជីក្រុមហ៊ុន ការដាក់ពាក្យសុំអាជ្ញាបណ្ណ ការគ្រប់គ្រងធនធានមនុស្ស ការរៀបចំព្រឹត្តិការណ៍ ឬ វគ្គបណ្តុះបណ្តាលផ្សេងៗ។
ទាក់ទងនឹងអារម្មណ៍របស់លោកក្នុងនាមជាវាគ្មិនពិសេស ក៏ដូចជាទៅលើក្រុមហ៊ុន ហ្គោលដេន អេហ្វអិកស៍ លីង ឃែភីថល លោក Lawrence បានមានប្រសាសន៍ថា៖ “ខ្ញុំតែងតែសប្បាយរីករាយ និងត្រៀមខ្លួនរួចជាស្រេចក្នុងការផ្ដល់ការគាំទ្រដល់ក្រុមហ៊ុនឈ្មួញជើងសាឧបករណ៍និស្សន្ទរបស់យើងតាមអ្វីយើងអាចធ្វើបាន។ គោលដៅរបស់យើង គឺការរីកចម្រើន មិនត្រឹមតែខ្លួនយើងប៉ុណ្ណោះទេ ប៉ុន្តែថែមទាំងក្រុមហ៊ុនឈ្មួញជើងសាឧបករណ៍និស្សន្ទរបស់យើងផងដែរពីព្រោះពួកយើងទាំងអស់គ្នាខិតខំធ្វើការដើម្បីឆ្ពោះទៅរកការអភិវឌ្ឍកាន់តែខ្លាំងឡើងនៃទីផ្សារឧបករណ៍និស្សន្ទនៅកម្ពុជា ក៏ដូចជាប្រទេសកម្ពុជាផ្ទាល់តែម្តង។ យើងបានធ្វើការជាមួយ ក្រុមហ៊ុន ហ្គោលដេន អេហ្វអិកស៍ លីង ឃែភីថល អស់រយៈពេលប៉ុន្មានឆ្នាំមកហើយ ហើយយើងដឹងថា ពួកគេគឺជាក្រុមហ៊ុនមួយ ដែលគោរពយ៉ាងខ្ជាប់ខ្ជួននូវបទបញ្ជាទាំងឡាយ និងមានភាពស្មោះត្រង់ជាមួយអតិថិជនរបស់ពួកគេ។”
ចំពោះសក្តានុពលនៃការផ្សារភ្ជាប់រវាងទីផ្សារឧបករណ៍និស្សន្ទ និងទីផ្សារអចលនទ្រព្យ លោក Lawrence បានបន្តថា៖ “ខ្ញុំមានភាពវិជ្ជមានលើការផ្សារភ្ជាប់នេះ និងឃើញអត្ថប្រយោជន៍ជាច្រើន។ យ៉ាងហោចណាស់ វានឹងផ្តល់នូវជម្រើសវិនិយោគកាន់តែច្រើន ហើយអនុញ្ញាតឱ្យវិនិយោគិនធ្វើពិពិធកម្មលើការវិនិយោគរបស់ពួកគេដើម្បីកាត់បន្ថយហានិភ័យ និងបង្កើនប្រាក់ចំណេញ។ ជាមួយគ្នានេះដែរ ខ្ញុំគិតថា វានឹងជួយជំរុញឱ្យមានសហគមន៍នៃវិនិយោគិនលើឧបករណ៍និស្សន្ទ និងវិនិយោគិនលើអចលនទ្រព្យ ដែលបង្កើតជាបណ្តាញដ៏ធំមួយ សម្រាប់ការចែករំលែកបទពិសោធន៍នៃការវិនិយោគ និងទស្សនៈវិស័យពីជ្រុងខុសៗគ្នា។ ការផ្សារភ្ជាប់ទីផ្សារទាំងពីរ នឹងបង្កើនឥទ្ធិពលទៅវិញទៅមករបស់ពួកវា ដែលនឹងនាំឱ្យមានប្រតិបត្តិការពាណិជ្ជកម្មកាន់តែខ្លាំងក្លា ហើយចុងក្រោយគឺកំណើនសេដ្ឋកិច្ច។”
លោក Lawrence បានបន្ថែមថា៖ “ខ្ញុំជឿជាក់ថា ការផ្សារភ្ជាប់នេះ នឹងបង្កើតធនធានមនុស្សបន្ថែមទៀត ជាពិសេសភ្នាក់ងារផ្ដល់ការប្រឹក្សា ទាំងលើសមត្ថភាពនិងប្រសិទ្ធភាព ពីព្រោះពួកគេនឹងអភិវឌ្ឍខ្លួនឯងដើម្បីបំពេញតម្រូវការទីផ្សារ និងការរំពឹងទុករបស់អតិថិជនរបស់ពួកគេ។ ដូច្នេះ រឿងរ៉ាវល្អៗជាច្រើន នឹងកើតមានពីការផ្សារភ្ជាប់នេះ។”
ក្រៅពីការចូលរួមក្នុងវគ្គបណ្តុះបណ្តាលនេះ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានផ្តល់ការគាំទ្រដល់ក្រុមហ៊ុនឈ្មួញជើងសាឧបករណ៍និស្សន្ទរបស់ខ្លួនយ៉ាងជោគជ័យក្នុងការទទួលបានអាជ្ញាបណ្ណពីគណៈកម្មការមូលបត្រកម្ពុជា ការរៀបចំវគ្គបណ្តុះបណ្តាលផ្ទៃក្នុង ការធ្វើឱ្យប្រសើរឡើងនៃប្រព័ន្ធបច្ចេកវិទ្យា និងការរៀបចំព្រឹត្តិការណ៍ផ្សេងៗ។
en
zh
