ក្រុមហ៊ុនខេមបូឌាន ដេរីវ៉េទីវ អ៊ិចឆេង នាំយកឱកាសមាសនៃការវិនិយោគសម្រាប់វិនិយោគិននៅមីយ៉ាន់ម៉ា

កាលពីថ្ងៃទី០៤ ខែកក្កដា ឆ្នាំ២០១៩ ក្រុមហ៊ុនខេមបូឌាន ដេរីវ៉េទីវ អ៊ិចឆេង ត្រូវបានអញ្ជើញជាវាគ្មិនកិត្តិយស ដើម្បីចូលរួមចែករំលែកក្នុងសិក្ខាសាលាមួយក្រោមប្រធានបទ “ឱកាសមាសសម្រាប់វិនិយោគិនឧបករណ៍និស្សន្ទ”។ សិក្ខាសាលានេះ ត្រូវបានរៀបចំឡើងដោយក្រុមហ៊ុន New World Financial Group នៅសណ្ឋាគារ Wyndham Grand Yangon នៃប្រទេសមីយ៉ាន់ម៉ា និងមានអ្នកចូលរួមជាវិនិយោគិនសក្ដានុពលជាង៧០នាក់។
នៅក្នុងសិក្ខាសាលានេះ លោក Min Htike Aung អភិបាលគ្រប់គ្រង និងលោក Kyaw Zin អ្នកចាត់ការទូទៅនៃក្រុមហ៊ុន New World Financial Group បានធ្វើការបង្ហាញពីប្រវត្តិដ៏ខ្លាំងក្លារបស់ក្រុមហ៊ុន New World Financial Group ព្រមទាំងបានប្រកាសពីការប្តេជ្ញាចិត្តយ៉ាងមុតមាំរបស់ក្រុមហ៊ុនក្នុងការនាំយកពន្លឺវិជ្ជមាន និងកត្តាជំរុញភាពជោគជ័យដល់ទីផ្សារឧបករណ៍និស្សន្ទនៅក្នុងប្រទេសមីយ៉ាន់ម៉ា។

បន្ទាប់ពីកិច្ចប្រជុំដំបូងៗរបស់ខ្លួនជាមួយក្រុមហ៊ុន New World Financial Group ក្រុមហ៊ុនខេមបូឌាន ដេរីវ៉េទីវ អ៊ិចឆេង បានខិតខំប្រឹងប្រែងយ៉ាងខ្លាំងក្នុងកិច្ចសហប្រតិបត្តិការនេះ និងជឿជាក់ថាវាអាចបង្កើតនូវលទ្ធផលវិជ្ជមានជាច្រើន ក្រោយពីក្រុមហ៊ុនខេមបូឌាន ដេរីវ៉េទីវ អ៊ិចឆេង បានចូលរួមយ៉ាងសកម្មជាមួយនឹងគណៈកម្មការមូលបត្រកម្ពុជាក្នុងការបង្កើតទីផ្សារឧបករណ៍និស្សន្ទស្របច្បាប់ជាលើកដំបូងនៅក្នុងប្រទេសកម្ពុជា។

ដោយប្រឡូកក្នុងវិស័យហិរញ្ញវត្ថុអស់រយៈពេលជាង 20 ឆ្នាំមកហើយ លោក Lawrence Kook អភិបាលនៃក្រុមហ៊ុន ខេមបូឌាន ដេរីវ៉េទីវ អ៊ិចឆេង បាននិងកំពុងផ្តល់ចំនេះជំនាញដល់វិនិយោគិនជាច្រើន និងបានលើកទឹកចិត្តពួកគេឱ្យបង្កើនបទពិសោធន៍ក្នុងការវិនិយោគ និងរៀបចំផែនការហិរញ្ញវត្ថុផ្ទាល់ខ្លួនផងដែរ។

នៅក្នុងសិក្ខាសាលានេះដែរ លោក Lawrance បាននិយាយថា៖ «នៅពេលនិយាយអំពីការជួញដូរឧបករណ៍និស្សន្ទ យើងនឹងឃើញថា គុណសម្បត្តិមានច្រើនជាងគុណវិបត្តិ ជាពិសេសនៅពេលវិនិយោគិនបានសិក្សាអំពីវា។ ការសិក្សានេះ គឺដូចជាការវិនិយោគរយះពេលវែងអញ្ចឹង។ នៅពេលដែលអ្នកសិក្សាអំពីព័ត៌មាននិងការវិភាគទីផ្សារកាន់តែច្រើន វានឹងក្លាយជាឧបករណ៍ដ៏សំខាន់មួយសំរាប់អ្នកក្នុងការវិនិយោគ៕»

កម្រងរូបថត

បន្ថែមទៀត