នៅថ្ងៃទី២៦ ខែកញ្ញា ឆ្នាំ២០២១ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានចូលរួមក្នុងកម្មវិធីខួបលើកទី១០ នៃវិទ្យាស្ថានឥណទាន និងច្បាប់ នៃមជ្ឈមណ្ឌលស្រាវជ្រាវឥណទានចិនរបស់សាកលវិទ្យាល័យប៉េកាំង ក្រោមប្រធានបទ «គំរូឥណទាន និងការកសាងប្រព័ន្ធក្នុងយុគសម័យឌីជីថល»។ ដោយស្របតាមគោលដៅនៃផែនការ៥ឆ្នាំលើកទី១៤ របស់សាធារណរដ្ឋប្រជាមានិតចិន វិទ្យាស្ថាននេះ និងដៃគូសម្ព័ន្ធភាពរបស់ខ្លួន មានកាតព្វកិច្ចបន្ដជំរុញយុទ្ធសាស្រ្តអភិវឌ្ឍន៍ស្របតាមទំនើបកម្ម និងសកលភាវូបនីយកម្ម ជាពិសេសនៅក្នុងវិស័យសេដ្ឋកិច្ច និងច្បាប់។
កម្មវិធីនេះបានទាក់ទាញអ្នកចូលរួមយ៉ាងច្រើនកុះករ រួមបញ្ចូលទាំងថ្នាក់ដឹកនាំជាន់ខ្ពស់នៅក្នុងវិស័យផ្សេងៗ អ្នកជំនាញមកពីនាយកដ្ឋានមានសមត្ថកិច្ច សាស្ត្រាចារ្យ និស្សិត និងភ្ញៀវកិត្ដិយសជាច្រើនទៀតដែលជាសមាសភាពមកពីវិស័យអប់រំ និងហិរញ្ញវត្ថុ។
វិទ្យាស្ថានឥណទាន និងច្បាប់ តែងតែបន្ដការខិតខំប្រឹងប្រែងជាមួយនឹងភាពប្រាកដនិយម និងការច្នៃប្រតិដ្ឋខ្ពស់ក្នុងការសិក្សាស្រាវជ្រាវ និងការស្វែងរកវិធីសាស្រ្ត ក៏ដូចជាគំនិតថ្មីៗពីសាកលវិទ្យាល័យប៉េកាំង ដោយផ្តោតសំខាន់ទៅលើការសិក្សាអំពីអភិបាលកិច្ចមូលដ្ឋាននៃការអភិវឌ្ឍសេដ្ឋកិច្ច និងការស្ថាបនា ការអភិវឌ្ឍរួមគ្នា និងមូលនិធិឥណទានរបស់ប្រទេសចិន។ អស់រយៈពេល ១០ឆ្នាំមកនេះ វិទ្យាស្ថានបានចូលរួមចំណែកយ៉ាងសំខាន់ក្នុងការកសាងសង្គមប្រកបដោយទំនុកចិត្ត និងវិស័យសេដ្ឋកិច្ចឱ្យ កាន់តែរឹងមាំល្អប្រសើរ ព្រមទាំងផ្ដល់នូវទ្រឹស្តីជាក់ស្តែង បទពិសោធន៍សម្បូរបែប និងរបកគំហើញថ្មីៗផងដែរ។
នៅក្នុងព្រឹត្តិការណ៍នេះ ក្នុងនាមជាអភិបាលរងនៃវិទ្យាស្ថានឥណទាន និងច្បាប់ និងជាអភិបាលនៃក្រុមហ៊ុន ខេមបូឌាន ដេរីវ៉េទីវ អ៊ិចឆេង លោក Lawrence Kook បានចូលរួមអបអរសាទរ និងចែករំលែកនូវបទពិសោធន៍ ក៏ដូចជាការយល់ដឹងស៊ីជម្រៅទាក់ទងនឹងគំរូឥណទានបច្ចុប្បន្ន និងការកសាងប្រព័ន្ធក្នុងយុគសម័យឌីជីថល។ លោកក៏បានបង្ហាញពីក្តីសុបិនរបស់លោក ដែលចង់ឃើញមានទីផ្សារឧបករណ៍និស្សន្ទដ៏រុងរឿងមួយនៅក្នុងប្រទេសចិន និងការបង្កើតឱកាសវិនិយោគល្អៗជាច្រើនទៀតផងដែរ។
លោកបានមានប្រសាសន៍ថា៖ «ខ្ញុំពិតជារីករាយណាស់ដែលបានចូលរួមក្នុងកម្មវិធីនេះ និងជាសមាជិកនៃវិទ្យាស្ថានឥណទាន និងច្បាប់។ គ្មានអ្វីផ្សេងច្រើនទេ ដែលល្អប្រសើរ និងមានតម្លៃជាងការរួមចំណែកក្នុងការពង្រឹងការអប់រំ ត្រួសត្រាយផ្លូវសម្រាប់ក្មេងជំនាន់ក្រោយនិងអភិវឌ្ឍធនធានមនុស្ស ស្វែងរករបកគំហើញថ្មីៗ និងពង្រឹងសេដ្ឋកិច្ចជាតិរបស់យើង។ បន្ទាប់ពីបានដឹកនាំក្រុមហ៊ុន ខេមបូឌាន ដេរីវ៉េទីវ អ៊ិចឆេង ឱ្យឈានមុខគេ និងចូលរួមត្រួសត្រាយទីផ្សារឧបករណ៍និស្សន្ទនៅកម្ពុជារួចមក ខ្ញុំអាចនិយាយថា ក្ដីសុបិនក្លាយជាការពិត ប្រសិនបើយើងអាចដើរតាមផ្លូវនិងនាំយកភាពជោគជ័យរបស់វិទ្យាស្ថានឥណទាន និងច្បាប់ទៅកម្ពុជា ហើយនាំមកវិញនូវបទពិសោធន៍នៃការបង្កើតទីផ្សារឧបករណ៍និស្សន្ទប្រកបដោយតម្លាភាពសម្រាប់ប្រទេសចិន។ នេះនឹងជាអត្ថប្រយោជន៍ដ៏ធំធេងសម្រាប់មនុស្សរាប់លាននាក់ជាច្រើនជំនាន់»។
ក្នុងនាមជាក្រុមហ៊ុនសមភាគីកណ្ដាលឈានមុខគេនៅក្នុងទីផ្សារឧបករណ៍និស្សន្ទនៅកម្ពុជា ក្រុមហ៊ុន ខេមបូឌាន ដេរីវ៉េទីវ អ៊ិចឆេង មានកិត្តិយសដែលបានចូលរួមក្នុងកម្មវិធីដ៏អស្ចារ្យនេះ ហើយក្រុមហ៊ុនប្តេជ្ញាបន្ដពង្រឹងសមត្ថភាពឱ្យស្របទៅនឹងបរិបទនៃបច្ចេកវិទ្យាឌីជីថល ដែលមានការរីកចម្រើនយ៉ាងឆាប់រហ័ស និងប្រកបដោយភាពច្នៃប្រតិដ្ឋ ដែលនឹងនាំមកនូវឱកាសជាច្រើនសម្រាប់អ្នកចូលរួមទីផ្សារទាំងអស់ ក្រោមការដឹកនាំរបស់និយ័តករមូលបត្រកម្ពុជា (ន.ម.ក)។