នាថ្ងៃទី២៨ ខែតុលា ឆ្នាំ២០២០ ក្រុមហ៊ុន ខេមបូឌាន ដេរីវ៉េទីវ អ៊ិចឆេង ដែលជាក្រុមហ៊ុនឈានមុខគេមួយនៅក្នុងវិស័យឧបករណ៍និស្សន្ទនៅកម្ពុជា បានបរិច្ចាគថវិកាចំនួន១ម៉ឺនដុល្លារ តាមរយៈសម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដើម្បីជួយសង្គ្រោះប្រជាពលរដ្ឋដែលរងគ្រោះដោយសារទឹកជំនន់។
បើយោងតាមគណៈកម្មាធិការជាតិគ្រប់គ្រងគ្រោះមហន្តរាយ ជំនន់ទឹកភ្លៀងបានវាយប្រហារប្រជាពលរដ្ឋប្រហែល៤ម៉ឺនគ្រួសារនៅក្នុងខេត្តមួយចំនួននៃប្រទេសកម្ពុជា ដែលជំរុញឱ្យពួកគាត់ត្រូវជម្លៀសខ្លួនទៅរកកន្លែងសុវត្ថិភាព និងស្ថិតក្នុងស្ថានភាពខ្វះខាតនូវតម្រូវការស្បៀង និងរបស់របរប្រើប្រាស់ចាំបាច់សម្រាប់ជួយសង្រ្គោះជីវិត។
លោកជំទាវ ឆាយ លក្ខិណា អគ្គនាយិកានៃក្រុមហ៊ុន ខេមបូឌាន ដេរីវ៉េទីវ អ៊ិចឆេង បានមានប្រសាសន៍ថា៖ «ការបរិច្ចាគនេះ គឺជាការចូលរួមចំណែកជួយសង្គមជាតិ ជាពិសេសប្រជាពលរដ្ឋដែលរងផលប៉ះពាល់ពីទឹកជំនន់ ហើយក៏ជាឆ្លើយតបទៅនឹងការអំពាវនាវរបស់សម្ដេចតេជោ ហ៊ុន សែន ក្នុងការទប់ទល់នឹងគ្រោះទឹកជំនន់ ព្រមទាំងកាត់បន្ថយជាអតិបរមានូវទុក្ខលំបាក និងហានិភ័យដល់អាយុជីវិតរបស់ប្រជាពលរដ្ឋ។»
នៅលើទំព័រហ្វេសប៊ុកផ្លូវការរបស់សម្តេចតេជោ ហ៊ុន សែន សម្ដេចបានថ្លែងអំណរគុណដល់ក្រុមហ៊ុន ខេមបូឌាន ដេរីវ៉េទីវ អ៊ិចឆេង ក៏ដូចជាសប្បុរសជននានា ដែលបានចូលរួមបរិច្ចាគជួយដល់ប្រជាពលរដ្ឋ ដែលកំពុងរងគ្រោះដោយសារជំនន់ទឹកភ្លៀងនាពេលនេះ៕